Tilgangslaust án breytinga á leiðarkerfi

Hugmyndin er góð, því verður ekki neitað, en ég sé ekki að með 20-30 mínútna millibili í leiðarkerfi breyti verðmiðinn nokkru. Þjónustan verður einungis grundvölluð á góðu, öflugu og tíðu leiðarkerfi vagnanna. Allar tilraunir með gjaldfrjálsan strætó eru dæmdar til að mistakast án leiðarkerfisbreytinga.

En kannski er það einmitt ætlunin, að sýna fram á það með tilraunatímabili að aukning farþega sé ekki svo mikil með gjaldfrjálsum strætó. Ég vona að svo sé ekki. 

Hér í Osló þarf ég sjaldnast að líta á tímaáætlun vagnanna, því þeir keyra flestir á 6-10 mínútna fresti frá morgni til kvölds alla virka daga. Ég fer bara út á stoppistöð þegar ég er tilbúin og næsti vagn er aldrei meira en í 10 mínútna fjarlægð. Það sama gildir þegar ég þarf að skipta um vagn til að komast á leiðarenda.

Settu upp skipulag þar sem allar ferðir skerast þannig að aldrei þurfi að bíða lengur en 10 mínútur á stoppistöð (helst minna í hríðarbyljunum) og sannaðu til, notendurnir eru fyllilega reiðubúnir til þess að greiða fyrir slíkt kerfi.

 

Frítt í strætó fyrir Kópavogsbúa

Athugasemdir

[María Kristjánsdóttir, 15.6.2007 kl. 01:03]

Gott að sjá þú ert byrjuð aftur að blogga. Er alveg sammála þessu með ferðirnar, en það má alveg vera ókeypis þangað til fólk er farið að venja sig á að fara með strætó. Annars ætlaði ég inn á hitt bloggið þitt til að senda Ragnheiði Lóu afmæliskveðjur og hamingjuóskir en tókst ekki að logga mig inn. Kærar kveðjur.

[Elfur Logadóttir, 15.6.2007 kl. 12:16]

Ég hef svosum ekkert á móti því að ferðirnar verði ókeypis, en mér finnst byrjað á öfugum enda, því fólk venur sig ekkert á strætó ef hann gengur á óhagkvæmum tíma. Ef strætósamgöngur eiga að vera raunverulegt val á Íslandi eins og í flestum öðrum Evrópulöndum, þá þarf að fjölga ferðunum og jafnvel líka minnka áhrif bílsins við skipulagsvinnu.

Ragnheiður Lóa þakkar kveðjurnar :) Frekari frétta annars að vænta eftir kl. 18 í kvöld.

Varðandi vefinn minn, þá þarf ekki innskráningu til þess að skilja eftir athugasemdir. Það nægir að opna þá færslu sem gera á athugasemdir við, og skrá textann í reitina fyrir neðan færsluna. 

[Ragnheiður Ólafía Davíðsdóttir, 25.6.2007 kl. 10:51]

Sæl Elfur mín.

Þakka þér fyrir að eiga eina elskulegustu og frábærustu móður sem þekkist. Mér sýnist á öllu að þér kippi í kynið! Hjartans kveðjur.

[Elfur Logadóttir, 26.6.2007 kl. 16:00]

Sæl Ragnheiður,

myndi taka heiðurinn ef ég hefði bara eitthvað haft með það að gera - sem var náttúrulega ekki - en hún á örugglega töluvert í því að ég er eins og ég er :)