Skoðun án vistunar, er það hægt?

Það er athyglisvert orðalagið sem danski dómsmálaráðherrann notar við tilgreiningu á ólöglegu athæfi tengdu barnaklámi. "Aðeins er ólöglegt að vista slíkt efni á tölvum ...".

Svarið sýnir annað hvort gríðarlega tæknilega vanþekkingu ráðherrans eða yfirlýsingu hans til þrengingar á skilgreiningunni um vistun gagna.

Staðreyndin er nefnilega sú að það er tæknilega ómögulegt að skoða efni á vef án þess að vista það niður á disk tölvunnar, spurningin er bara hversu lengi efnið dvelur þar. Það er til búnaður sem heldur því fram að vegsummerki skoðunar verði ekki til staðar að henni lokinni, en tölvan verður að taka til sín efnið og vista það til þess að geta birt það á skjánum hjá viðkomandi. Þess vegna fer efnið alltaf á diskinn og samkvæmt almennri skilgreiningu á vistun gagna, er skoðunin því ólögleg, þar sem vistun á sér stað - þó eingöngu til skamms tíma sé.

Óþægilegt er til þess að vita að danski dómsmálaráðherrann sé líklegast með orðum sínum að þrengja almenna skilgreiningu á vistun gagna, þannig að skammtímavistun vegna móttöku efnis og birtingar á skjá falli þar ekki undir. Hvar liggja svo mörkin? Á þá að skilja það þannig að allt efni sem finnst í svokölluðu cache á tölvum viðkomandi sé ekki vistað? Gildir það sama um My Received Files, möppuna þar sem allt efni sent í gegnum MSN vistast? Eða aðrar sambærilegar möppur tengdar öðrum forritum?

Það væri miklu æskilegra að þrengja lögmæti athæfisins við ásetning, ef ástæða er til þrengingar yfir höfuð.

Ekki ólöglegt að skoða barnaklám í Danmörku

Athugasemdir

[Ómar (IP-tala skráð) 21.4.2007 kl. 20:29]

Það er tæknilega lítið mál að vera með browser sem vistar engu á harða diskinn, getur tildæmis notað RAM disk sem notar vinnsluminnið sem geymslumiðil þar sem allt strokast út þegar slökkt er á tölvunni.

Þar að auki man ég eftir að hafa séð browser fyrir um 2 árum sem vistaði engu á harða diskinn þegar maður notaði hann.

Þannig að það er ekki satt sem þú segir að það sé tæknilega ómögulegt að skoða efni á netinu án þess að vista það á harða disknum. 

[Elfur Logadóttir, 22.4.2007 kl. 00:36]

Ég valdi orðalagið "disk tölvunnar". Hefði kannski átt að vera aðeins ónákvæmari og segja "í tölvunni" eða eitthvað slíkt, en taldi óþarft að fara í slíka nákvæmnisaðgreiningu við þetta tilefni. 

Þar sem umræddur RAM diskur sem þú nefnir sem mögulega undankomuleið, er geymdur í tölvunni, fellur hann tvímælalaust undir vistun á disk tölvunnar en það er líka aukaatriði.

Lykilatriðið er tímafaktorinn. Eins og þú nefnir réttilega eru til forrit sem fullyrða að ekkert verði eftir til upplýsinga um ferðir viðkomandi eftir endurræsingu en ég hef ekki heyrt ennþá um leið til þess að taka á móti þeim pökkum sem sendir eru yfir netið og saman mynda skjal (t.d. mynd) án þess að vista þá á skammtímasvæði á diski tölvunnar á meðan þeim er safnað saman og þar til skjalið er tilbúið til birtingar. Þegar skjalið er tilbúið til birtingar er vissulega mögulegt að það fari ekki í cache möppu sem fylgja almennum vöfrum heldur vistist í minninu. En tíminn þarna á milli er tími þar sem skjalið er vistað á diskinum. Stundum er um að ræða nanó sekúndur og stundum lengri tíma, en vistunin á sér stað.

Ég verð fyrst til að viðurkenna það ef ég fer með fleipur, en þar sem vistun gagna og þá sérstaklega eintakagerð í skilningi hugverkaréttar er hluti af því námi sem ég nú er að leggja lokahönd á, læt ég fullyrðinguna standa enn um sinn.

[Steinunn Helga Sigurðardóttir, 22.4.2007 kl. 12:04]

Í dag er dagur Jarðar ! Til hamingju með það, Ljós og friður til Jarðainnar og Þín Steina